മഞ്ഞുകാലമാകുമ്പോൾ അന്തരീക്ഷത്തിലെ തണുപ്പ് വർദ്ധിക്കുകയും, അതിനോട് അനുബന്ധമായി പല ത്വക് രോഗങ്ങൾ ഉടലെടുക്കുകയും ചെയ്യും,അതിനാൽ ഇത്തരം ബുദ്ധിമുട്ടുകൾ പരിഹരിക്കാൻ ആയുർവേദം നിർദേശിക്കുന്ന രീതികളും ഔഷധ പ്രയോഗങ്ങളെ കൊണ്ടും സാധിക്കും.
ത്വക്കിലുണ്ടാകുന്ന വിണ്ടുകീറൽ, വരൾച്ച, പാടുകൾ എന്നിവ തടയാൻ:
• വെളിച്ചെണ്ണ, നെയ്യ്, വെണ്ണ മുതലായവ പുരട്ടുക
• കൈകാലുകൾ കഴുകി വൃത്തിയാക്കിയതിനു ശേഷം ശതധൗതഘൃതമോ, പിണ്ഡതൈലമോ പുരട്ടാം.
• ആര്യവേപ്പ്, മഞ്ഞൾ എന്നിവ ചേർത്തരച്ചു പുരട്ടുന്നതും നല്ലതാണ്.
• അത്തി, ഇത്തി, അരയാൽ, പേരാൽ എന്നിവയുടെ തോൽ ഇട്ട് വെന്തവെള്ളം കുളിക്കാൻ ഉപയോഗിക്കാം.
• ആഴ്ചയിൽ രണ്ട് മൂന്ന് തവണയെങ്കിലും എണ്ണതേച്ച് മൃദുവായി തിരുമ്മി ഇളം ചൂടുവെള്ളത്തിൽ കുളിക്കാം.
• ആര്യവേപ്പ്, ആടലോടകം, പുളിയില,കരിനൊച്ചി,നെല്ലിക്കാ പ്പൊടി, ത്രിഫല ചൂർണം, നാൽപ്പാമരത്തൊലി എന്നിവയിലേതെങ്കിലും ഇട്ട് തിളപ്പിച്ച വെള്ളം നല്ലത്.
• കുളി കഴിഞ്ഞ ശേഷം ശുദ്ധമായ വെളിച്ചെണ്ണ പുരട്ടാം.
• അമിതമായ എണ്ണമയം മാറുന്നതിന് ഇഞ്ചയോ / പയറുപൊടിയോ /കടലമാവോ ഉപയോഗിക്കാം, ഇത് വരൾച്ച കുറയ്ക്കും
• തൊലിപ്പുറത്തുണ്ടാകുന്ന നിറം മാറ്റങ്ങൾക്കും പാടുകൾക്കും നെല്ലിക്കപ്പൊടി,ത്രിഫലചൂർണം എന്നിവ കയ്യോന്നിനീരിലോ നീലയമരിച്ചാറിലോ അരച്ചു പുരട്ടുന്നത് നല്ലതാണ്.
• തൊലിപ്പുറത്തുണ്ടാകുന്ന ചെറിയ പൊട്ടലുകൾ, ഉൾഭാഗത്തുള്ള പഴുപ്പ് എന്നിവയ്ക്ക് കറ്റാർവാഴ ജെല്ലിൽ മഞ്ഞൾപ്പൊടി ഇട്ട് പുരട്ടാവുന്നതാണ്.
• ത്രിഫല ചൂർണം /മഞ്ഞൾ/ നെല്ലിക്കപ്പൊടി എന്നിവയിലേതെങ്കിലും ശുദ്ധമായ തേങ്ങാപ്പാലിൽ അരച്ച് ദേഹത്ത് പുരട്ടുക വഴി ചർമ്മ വരൾച്ച ഒഴിവാക്കാം.
മഞ്ഞുകാലത്ത് ഉപയോഗിക്കേണ്ട ആഹാരങ്ങൾ :
• വിവിധ തരം കഞ്ഞികൾ തേങ്ങാപ്പാൽ, ശുദ്ധമായ അല്പം നാടൻ നെയ്യ്, ചെറിയ ഉള്ളി മൂപ്പിച്ചത് എന്നിവ ചേർത്ത് കഴിക്കാം.
• വെള്ളം ഇളം ചൂടോടുകൂടി കുടിക്കുക. പതിമുഖം, കരിങ്ങാലി തുടങ്ങിയവ ഇട്ട് തിളപ്പിച്ച വെള്ളം നല്ലതാണ്.
• മുരിങ്ങാക്കായ, ചെറുപയർ, വാഴക്കൂമ്പ്, നാളികേരം,ഉണക്കമുന്തിരി, നെല്ലിക്ക, ഉറുമാമ്പഴം, എന്നിവ ഭക്ഷണത്തിൽ ഉൾപ്പെടുത്താം.
മഞ്ഞുകാലത്ത് ഉപയോഗിക്കാൻ പാടില്ലാത്ത ആഹാരങ്ങൾ :
• എരിവും പുളിയും കുറയ്ക്കാം
• പഴകിയ ഭക്ഷണം, വീണ്ടും ചൂടാക്കിയ ഭക്ഷണം, ഫാസ്റ്റ് ഫുഡ്, തണുത്തതും ദഹിക്കാൻ പ്രയാസമേറിയതുമായ ഭക്ഷണം,പുളിപ്പിച്ച മാവ് കൊണ്ടുള്ള ഭക്ഷണം, എന്നിവ കഴിച്ചാൽ തണുപ്പ് കാലത്തെ ബുദ്ധിമുട്ടുകൾ കൂട്ടും.
• എരിവ്,പുളി, ഉപ്പ്,അച്ചാർ,തൈര്, പപ്പടം,എള്ള്, ഉഴുന്ന്,കിഴങ്ങുവർഗം, മത്സ്യം പ്രത്യേകിച്ച് ചെമ്മീൻ മുതലായവയുടെ ഉപയോഗം കുറയ്ക്കാം.
📧 anildast29@gmail.com
Comments
Post a Comment