ഉദരസംബന്ധമായ ബുദ്ധിമുട്ടുകൾ ഉണ്ടാക്കുന്ന വൈറസുകളാണ് നോറോ വൈറസ്. അതിവ്യാപന ശേഷിയുളള നോറോ വൈറസ് വൊമിറ്റിങ് ബഗ്(winter vomiting bug) എന്ന് കൂടി അറിയപ്പെടുന്നു. Caliciviridae എന്ന വൈറസ് കുടുംബത്തിലാണ് നോറോ വൈറസ്.
1968-ൽ ഒഹായോയിലെ നോർവാക്ക് നഗരത്തിൽ ഈ രോഗം പടർന്നു പിടിച്ചു, അന്നു മുതൽ നോറോവൈറസ് എന്ന പേരിലാണ് ഈ വൈറസ് അറിയപ്പെടുന്നത്. അതിസാരവും ചർദിയുമാണ് പ്രധാന ലക്ഷണം.
സാധാരണയായി വൈറസുമായി സമ്പർക്കം വന്ന് കഴിഞ്ഞ് 12 മുതൽ 48 മണിക്കൂറിനുള്ളിൽ ലക്ഷണങ്ങൾ ആരംഭിക്കാം. നോറോവൈറസ് അണുബാധയുടെ ലക്ഷണങ്ങൾ സാധാരണയായി 1 മുതൽ 3 ദിവസം വരെ നീണ്ടുനിൽക്കും. മിക്ക ആളുകളും ചികിത്സ കൂടാതെ പൂർണ്ണമായും സുഖം പ്രാപിക്കുന്നു.ശൈത്യകാലത്താണ് നോറോവൈറസ് അണുബാധ കൂടുതലായി ഉണ്ടാകുന്നത്. ഇത് പലപ്പോഴും ആളുകൾ തിങ്ങിപ്പാർക്കുന്ന ഇടങ്ങളിലാണ് പൊട്ടിപ്പുറപ്പെടുന്നത്. ആരോഗ്യമുള്ളവരിൽ ഗുരുതരമായ രീതിൽ ബാധിക്കാൻ ഇടയില്ല. എന്നാൽ ചെറിയ കുട്ടികളെ ഗുരുതരമായി ബാധിക്കും, പ്രായമായവർ, മറ്റ് അനുബന്ധ രോഗങ്ങളുള്ളവർ എന്നിവരെ ബാധിച്ചാൽ ഗുരുതരമാകാൻ സാധ്യതയുണ്ട്.
എങ്ങിനെ പകരുന്നു ?
• വായിലൂടേയും വിസർജ്യങ്ങളിലൂടേയും ആണ് വൈറസ് സാധാരണയായി പടരുന്നത്.
• മലിനമായ ഭക്ഷണത്തിലൂടെയോ വെള്ളത്തിലൂടെയോ വ്യക്തികൾ തമ്മിലുള്ള സമ്പർക്കത്തിലൂടെയോ ആകാം.
• മലിനമായ പ്രതലങ്ങളിലൂടെ
• രോഗബാധിതനായ വ്യക്തിയുടെ ഛർദ്ദിയിൽ നിന്ന് വായുവിലൂടെയോ പടരാം.
• വൃത്തിഹീനമായ ഭക്ഷണം തയ്യാറാക്കൽ, അടുത്തിടപഴകൽ എന്നിവ അപകടസാധ്യതാ ഘടകങ്ങളിൽ ഉൾപ്പെടുന്നു.
ലക്ഷണങ്ങൾ:
• വയറിളക്കം
• ഛർദ്ദി
• മനംപിരട്ടൽ
• വയറു വേദന
• അലസത
• ബലഹീനത
• പേശി വേദന
• തലവേദന
• കുറഞ്ഞ തോതിൽ പനി
പ്രതിരോധ മാർഗ്ഗങ്ങൾ:
• സോപ്പും വെള്ളവും ഉപയോഗിച്ച് കൈ കഴുകുക.
• രോഗവ്യാപനം ഉണ്ടാകുന്ന വേളയില്‍ ഹൈപോക്ലോറൈറ്റ് സൊല്യൂഷന്‍ ഉപയോഗിച്ച് പ്രതലങ്ങള്‍ അണുവിമുക്തമാക്കണം.
• രോഗം ഉള്ളവർ വീട്ടിലിരിക്കേണ്ടതാണ്, ഒ.ആർ.എസ്. ലായനി, തിളപ്പിച്ചാറിയ വെള്ളം എന്നിവ കുടിക്കാം.
• രോഗികൾ മറ്റുള്ളവർക്ക് ഭക്ഷണം പാകംചെയ്യാതിരിക്കാനും പ്രത്യേകം ശ്രദ്ധിക്കണം
• ക്ലോറിനേറ്റ് ചെയ്ത വെള്ളം ഉപയോഗിക്കുക.
• പഴങ്ങളും പച്ചക്കറികളും കഴുകിയതിന് ശേഷം മാത്രം ഉപയോഗിക്കുക.
• പഴകിയതും, തുറന്നുവെച്ചതുമായ ഭക്ഷണപദാർഥങ്ങൾ, കേടുവന്ന പഴങ്ങൾ, പച്ചക്കറികൾ,തണുത്ത ഭക്ഷണം തുടങ്ങിയവ ഉപയോഗിക്കാതിരിക്കുക.
ലക്ഷണങ്ങൾ ഗുരുതരമായാൽ ഡോക്ടറുടെ സഹായം തേടണം. ആര്‍ടി പിസിആര്‍ പരിശോധനയിലൂടെയാണ് രോഗനിര്‍ണയം നടത്തുന്നത്. ഈ വൈറസിന് വാക്സിനുകള്‍ കണ്ടെത്തിയിട്ടില്ല. ശരീരത്തിലെ ജലാംശം നിലനിര്‍ത്തുകയെന്നത് പ്രതിരോധത്തില്‍ പ്രധാനമാണ്.
📧 anildast29@gmail.com
Comments
Post a Comment